Մարդու իրավունքների եվրոպական դատարանի (ՄԻԵԴ) դատական տարվա բացման կապակցությամբ, ՄԻԵԴ նախագահ Մաթիաս Գիյոմարի հրավերով Ստրասբուրգ քաղաք երկօրյա աշխատանքային այցի ընթացքում, ՀՀ Վճռաբեկ դատարանի նախագահ Լիլիթ Թադևոսյանը հանդիպում է ունեցել ՄԻԵԴ նախագահի հետ։ Հանդիպմանը մասնակցել է Մարդու իրավունքների եվրոպական դատարանի դատավոր Վահե Գրիգորյանը։

  Հանդիպման շրջանակներում երկուստեք ընդգծվել է Մարդու իրավունքների եվրոպական դատարանի և ՀՀ Վճռաբեկ դատարանի միջև մի շարք ուղղություններով, այդ թվում՝ բարձր դատարանների ցանցի շրջանակներում, արդյունավետ փոխգործակցության շարունակականության ապահովման և կայուն երկխոսության ամրապնդման կարևորությունը։

 Այցի շրջանակներում ՀՀ Վճռաբեկ դատարանի նախագահ Լիլիթ Թադևոսյանը մասնակցել է «Լրատվամիջոցների բազմակարծությունը և ժողովրդավարական գործընթացների պաշտպանությունը մարտահրավերներով լի ժամանակներում» բարձր մակարդակի համաժողովի աշխատանքներին։

 Այցի ընթացքում Վճռաբեկ դատարանի նախագահը հանդիպումներ է ունեցել նաև «Ժողովրդավարություն՝ իրավունքի միջոցով» եվրոպական հանձնաժողովի (Վենետիկի հանձնաժողով) նախագահ Մարտա Կարտաբիայի և Եվրոպայի Խորհրդի Մարդու իրավունքների և իրավունքի գերակայության գլխավոր տնօրինության Մարդու իրավունքների հարցերով տնօրեն Քլեր Օվեյի հետ։

 Հանդիպումների ընթացքում քննարկվել են փոխգործակցության խորացման հեռանկարներն ու հիմնական ուղղությունները, երկուստեք հետաքրքրություն ներկայացնող այլ հարցեր։