THE PRESIDENT OF THE COURT OF CASSATION LILIT TADEVOSYAN PARTICIPATED IN THE CEREMONIAL SESSION OF THE OPENING OF THE EUROPEAN COURT OF HUMAN RIGHTS’ JUDICIAL YEAR AND THE WORKS OF THE HIGH-LEVEL CONFERENCE
Մարդու իրավունքների եվրոպական դատարանի նախագահ Շիոֆրա Օ՛Լիրիի հրավերով, Ֆրանսիայի Հանրապետության Ստրասբուրգ քաղաքում երկօրյա աշխատանքային այցի ընթացքում, ՀՀ Վճռաբեկ դատարանի նախագահ Լիլիթ Թադևոսյանը հունվարի 26-ին այցելել է Մարդու իրավունքների եվրոպական դատարան և պաշտոնական հանդիպում ունեցել ՄԻԵԴ նախագահի հետ, իսկ հունվարի 27-ին մասնակցել է Մարդու իրավունքների եվրոպական դատարանի դատական տարվա բացման հանդիսավոր նիստին ու դրան հաջորդող բարձր մակարդակի միջազգային խորհրդաժողովի աշխատանքներին:
Մարդու իրավունքների եվրոպական դատարանի նախագահ Շիոֆրա Օ՛Լիրիի հետ հանդիպման ընթացքում ՀՀ Վճռաբեկ դատարանի նախագահ Լիլիթ Թադևոսյանն ընդգծել է ազգային իրավական համակարգում միջազգային լավագույն փորձի և առաջադեմ չափանիշների արդյունավետ կենսագործման ապահովման կարևորությունն ու նշել, որ Մարդու իրավունքների եվրոպական դատարանի կողմից ձևավորվող իրավական պաշտպանության արժեքներն ինտեգրվել են և շարունակում են ինտեգրվել անդամ պետությունների իրավական համակարգում՝ բարձրագույն դատական ատյանների կողմից ձևավորվող նախադեպային իրավական դիրքորոշումներով:
Վճռաբեկ դատարանի նախագահը նշել է, որ 2018 թվականի օգոստոսի 1-ին Եվրոպական կոնվենցիայի 16-րդ արձանագրությունն ուժի մեջ մտնելուց հետո նոր արդյունավետ հարթակ է ձևավորվել Մարդու իրավունքների եվրոպական դատարանի և ազգային բարձր դատական ատյանների համագործակցության համար՝ հնարավորություն ընձեռելով ազգային դատարաններին իրենց ներդրումն ունենալ Եվրոպական իրավակարգի և իրավական արժեքների պահպանության գործում և սկիզբ դնելով նոր իրավական մշակույթի ձևավորման համար։ Հատկանշական է, որ Հայաստանի Հանրապետության բարձրագույն դատական ատյաններն առաջիններից են եղել Եվրոպայի խորհրդի անդամ պետությունների ազգային դատարաններից, որոնք, արձանագրությունն ուժի մեջ մտնելուց հետո, այս կարճ ժամանակահատվածում, օգտագործել են այդ կառուցակարգը։
Հանդիպման ավարտին ՀՀ Վճռաբեկ դատարանի նախագահ Լիլիթ Թադևոսյանը և Մարդու իրավունքների եվրոպական դատարանի նախագահ Շիոֆրա Օ՛Լիրին երկուստեք ընդգծել են Եվրոպական դատարանի և ՀՀ Վճռաբեկ դատարանի միջև արդյունավետ փոխգործակցության ու կայուն երկխոսության ամրապնդման կարևորությունը։
The website development of the Court of Cassation of Armenia was supported within the Project "Supporting the criminal justice reform and harmonising the application of European standards in Armenia" co-funded by the European Union and the Council of Europe. The content and views expressed on the website of the Court of Cassation of Armenia can in no way be taken to reflect the official opinion of the European Union and the Council of Europe".